簡單易學母親節蛋糕 +燕窩下午茶自助餐，正呀!!!

上個星期六非常開心可能出席U beauty x 皇家太平洋酒店舉辦既活動~
呢個活動係好豐富，主要學整母親節精選甜品 + 「春日‧盛燕」下午茶自助餐試食會~
去到先會學整蛋糕，不過由於時間關係，所以材料都預先準備好哂，
去到就分左2個人一組一齊整一個蛋糕，其實我地主要都係學整蛋糕既步驟同學吱cream，
當日只係需要砌返個蛋糕同裝飾下，都冇咩難度~好易上手呀，哈哈~

大概都分享下點整啦^^
(1) 準備好海綿蛋糕3塊，師傅好細心幫我地切左心形~
(2) 海綿蛋糕吱上適量忌廉，唔好貪心吱太多，如果唔係會爆哂出黎唔靚ga啦~
(3) 加入芒果粒 & 朱古力脆脆，如果你鐘意的話，加d jelly碎都得ga~
(4) 加好芒果粒 & 朱古力脆脆之後再係面加小小忌廉上去，師傅話咁先痴得住上面果層ga~
(5) 整好哂2層之後，就圍邊吱cream，我覺得最難係呢part，因為好難吱得靚~哈哈~
(6) 圍完邊再吱埋蛋糕面就搞掂哂啦，最後加上裝飾就大功告成^^

我地既製成品，都幾靚呀~哈哈!!!

整完蛋糕就係時候試食皇家太平洋酒店既「春日‧盛燕」下午茶自助餐啦~!!!
行左一個圈睇下，可能係下午茶時段所以甜品特別多，真係睇見都流口水呀!!!

今次皇家太平洋酒店用「春日‧盛燕」做主題，咁當然唔小得有燕窩做既精美食物啦~

相入面幾款係我覺得要推介既，特別係燕窩雞粥，真係好好味，夠味之餘仲煲得好綿tim!!!
章魚燒餅都幾好食，比出面食到既大咁咸，所以可以食到章魚既鮮味~
燕窩蛋韃都唔錯，d蛋槳唔會太甜幾好味ga~
而賣相好靚既燕窩芒果布甸，我就覺得質地整得唔錯但對我黎講就甜左d啦~哈哈~

除左燕窩系列既甜品之外，其實佢d熱盤都唔錯，刺身款式雖然唔多但勝在夠新鮮~
另外，我仲想推介相入面既椰汁西米糕，唔好睇佢外表平淡，但真係好好味道~
可能我自己都整過呢樣甜品，做法唔難，但要好食都唔係易事，
好容易整到一係太淋一係太硬，再唔係太甜或者冇椰汁味，
但佢呢件真係整得好出色，各方面都好好，所以我食左4,5件~哈哈哈哈~

同埋皇家太平洋酒店d蛋糕真係整得好靚，賣相好吸引~
全部我都食過，唔止睇得仲ok好食ga~

快樂不知時日過，好快就食左2個鐘啦，成個活動都係歡笑聲下進行，又識到新朋友~好開心呀!!
而係我地食既期間，師傅已經幫我地分好自己整既蛋糕，每人有半個拎返屋企~
我覺得得半個拎走係美中不足既地方，因為知道為母親節整既蛋糕，我都一早同媽咪講左~但返到屋送俾媽咪佢好奇怪點解得半個~好似有小小失望咁，
唯有俾返幅相佢睇下本身個蛋糕係點啦~哈哈~

媽咪收到我親手整既蛋糕都好開心既，仲即刻切黎食，佢仲話好好味tim呀~哈哈~
有時間，我一定要整返一個完整既蛋糕用俾媽咪先得!!
母親節就到啦，我覺得禮物唔一定要貴，最緊要係果份心意~
大家有時間都整返個蛋糕氹下自己媽咪啦，預祝各位母親節快樂^^