hosy214

2016/05/31

Baby Naturals by Watsons金盞花系列- 令BB肌膚時刻保持柔嫩 Q 彈

唔知之前有冇講過，翱B細個果時成日俾濕疹搞到周身痕~
所以潔膚護膚既，我一定會好認真咁幫佢揀，唔想佢再受皮肉之膚~
(關於濕疹，有機會我再打一篇同大家分享下)
今次就試到一SET好經濟又唔錯既產品想介紹俾大家識，佢就係Baby Naturals by Watsons 全新推出的金盞花系列啦~
金盞花系列係由澳洲製造，含有機認證金盞花萃取精華，配合乳木果及蜂蜜等天然滋潤成份~
絕無 Paraben 類防腐劑、矽、礦物油、酒精等有害成份~
而且經皮膚科測試，溫和低刺激配方可長效保濕、舒緩及修護肌膚~

金盞花洗髮沐浴露 (250ml / $31.5)
• 清潔同時幫助維持肌膚水份
• 讓髮絲柔軟順滑
• 配方溫和，不刺激眼睛

呢支係洗髮沐浴露黎架，我最鐘意唔使分開兩支咁煩~
250ml先係三十幾蚊，比起我之前用C字頭既真係平左一大節呀!!!
氣味係好淡既花香味，唔需要擔心好人工化學味，我覺得陣味ok的^^

份量亦唔需要多，大概半泵就夠洗頭，沖涼就大概一泵左右啦~

輕輕按摩就已經有好多泡泡，一過水就乾淨哂，唔會話滑潺潺既感覺~
最緊要係清爽得黎唔會乾，好用呀^^

金盞花潤膚露 (250ml / $56.9)
• 滋潤修護，同時補充肌膚水份
• 配方輕爽不油膩，容易吸收

揀潤膚露我覺得最緊要係易推開同唔笠~
呢款金盞花潤膚露都滿足到我要求，潤得黎唔會笠，淡淡既花香味~
而且真係一D都唔貴，翱B而家成日都要自己的事自己做，真係俾佢亂搽都唔心痛~

金盞花潤膚霜 (100ml) 建議零售價：$ 49.9
• 滋潤修護，同時補充肌膚水份
• 配方滋養不油膩，深層呵護

金盞花潤膚霜我就用黎幫佢搽面既，滋潤度比潤膚露高D~
質地比較厚小小，好岩臨訓前幫佢搽一層，咁就唔怕開冷氣抽走佢D水份啦~

金盞花按摩護膚油 (100ml) 建議零售價：$68.9
• 幫助修護及滋養肌膚，預防乾燥
• 配方不含礦物油，容易吸收，不堵塞毛孔

金盞花按摩護膚油係整個系列我最鍾意既產品~
好多人都好怕搽油會油笠笠，其實好既油搽完真係一D都唔會油~
吸收完真係會比淨係LOTION滋潤架~

除左我，翱B都好鍾意支油，臨訓前都會問我拎支油搽~
俾佢自己搽勻，我會再幫佢按摩下手仔腳仔，咁佢都會訓得好D^^
呢SET金盞花系列真係好用又好抵，而家好方便買tim~
有興趣既快D去Watsons睇下了解下啦~

(感謝產品及資訊由Watsons提供)

2016/05/23

Shu Uemura~帶來舒適潔顏卸妝新體驗

卸妝呢part我向來好注重，因為徹底清潔好肌膚護膚品先會吸收得好~

用過好多品牌既卸妝油，始終都係覺得Shu Uemura係最得我心~

尤其綠茶抗氧化我就最鐘意啦！

Anti/Oxi+ Pollutant & Dullness Clarifying Cleansing OilAnti/Oxi+ 昇級綠茶抗氧化潔顏油 (150ml / $265)

成分含有辣木精華、綠茶精華、銀杏葉精華，適合混合性至乾性肌膚~

新增植物三部曲成份，能清除PM2.5及其他污染物，帶來舒適的潔顏體驗~

而且有效去除蠟黃暗啞，肌膚回復細緻、潤澤、透亮~

由於化係面卸妝影相比較難睇得出效果，加上我本身做左飄眉~

所以我將個妝畫左係手背上，大家可以睇得更清楚個卸妝效果啦^^

我用既大部分都係防水產品，特登加埋好難卸得乾淨既閃粉眼線去做測試~

首先將適量潔顏油搽勻係乾爽既面部~

全面用我大概按3-4下就夠，佢有好淡既香味，質地都唔係好笠既油，比較輕身好清爽~

之後輕輕塗勻乾爽既全面輕輕打圈按~

跟住再加清水輕輕按摩，潔顏油會乳化變白色~

之前過清水徹底洗淨就完成成個卸妝，好方便呀！

搽左卸妝油按摩之後，基本上大部分化妝品係乳化過程已經卸哂~

只係閃粉眼線仲有幾粒痴住，我用小小力卒幾下就全部甩哂，所以手背有小小紅印~

過完水，完全妝都卸哂非常乾淨，最緊要係一啲都唔會乾~

大愛呢支shu Uemura昇級綠茶抗氧化潔顏油呀！

大家快啲試下啦，保證一試愛上！

(感謝shu Uemura提供資訊及產品)

2016/05/02

SUNPLAY瞬間清爽，無懼同陽光玩遊戲

又到夏天啦，太陽越黎越猛，紫外線越黎越勁~
戶外活動時係時候出動高防曬度數既產品啦~
我一向用開極受歡迎既SUNPLAY SARAFIT輕透日用防曬系列，今年仲有升級版添呀！
今次升級竟然敢挑戰比水更輕、更薄既無存在感！
升級版產品有SUNPLAY SARAFIT輕透防曬水凝乳&輕透水感防曬噴霧~

SUNPLAY SARAFIT 輕透防曬水凝乳（$84.9/50g）
SUNPLAY SARAFIT Smooth Watery Essence SPF50+/PA++++ 升級配方塗抹時瞬間化為透明，肌膚感受更持久舒爽、更耐汗~
- 添加 Dry Keep Powder,在肌膚上形成「無存在感」、比水更薄的清爽保護，適合每天日常、外出活動使用。
- 耐汗成分有效隔離汗水，使防曬成分更持久不易脫落,流汗也不黏膩
- 無酒精、無香料、無色素、無礦物油,可每天安心使用
-可作妝前底霜,面部、全身均適用
- 普通潔面產品即可卸除

升級版比之前真係更薄，吸收得快一啲都唔笠好爽~
我會當佢做base，之後再化妝都好貼唔浮粉架~
無防曬果種臭味，最緊要係出左汗都唔會流白汗，勁like！

SUNPLAY SARAFIT 輕透水感防曬噴霧（ $99.9/150ml）
SUNPLAY SARAFIT UV Mist SPF50+/PA++++ 輕鬆一噴，即形成透明保護~
方便噴塗背部、頭髮及全身，多次補塗也依然清爽,透明不泛白~
- 極清爽水凝透明噴霧，一噴即形成透明防曬保護,方便迅速
- 無一般防曬產品的難聞氣味
- 特有 Dry Keep Powder 清爽速乾配方，令肌膚即使出汗也不黏膩，係肌膚上形成「無存在感」、比水更薄的透明保護
- 耐汗成分使防曬保護持久不脫落，適合戶外及日常使用

- 可噴於頭髮、頭皮、背部及腳等難以塗抹的部位
- 無酒精、無香料、無色素、無礦物油,可每天安心使用 - 普通潔面產品即可卸除

除左臉，身體都要搽防曬架搽身最怕就係痴笠笠，好唔舒服架嘛~
而且用手搽又好慢，所以用噴霧既就最方便~

以下就做左個小實驗，睇下係咪真係可以做到比水更薄，無存在感呢~
實驗好簡單，分別有A同B兩樽噴霧~
一支係水，一支就係輕透水感防曬噴霧~係唔知邊支係咩既情況下試下邊個比較清爽舒服，無存在感啦~

A樽噴出黎好快依附左係手，完全無水氣，流黎流去既情況~
無色無味，好快吸收哂，好清爽一啲都唔笠~
噴灑既范圍都ok大，一隻手臂幾下就覆蓋哂，好方便~

B樽噴出黎好明顯比A樽濕~
同樣將佢噴係手臂，結果係手臂濕哂~
所以好明顯呢支係水啦~

估唔到真係防曬可以做到比水更薄更清爽~
大like呀！今個夏天無懼陽光可以大玩特玩啦^^

(感謝產品由Mentholatum提供)

2016/04/27

ASANA一秒神水1秒滲透，肌膚白滑緊彈好幫手

湊仔生活非常忙碌，而家轉季天氣時冷時熱好唔穩定~

皮膚都開始變得暗啞，加上年紀開始大，真係要更加注意肌底護理~

一向都有用開用肌底精華，而最近好開心可以試到近期好hit既ASANA一秒神水~

ASANA一秒神水（150ml / $333)

韓國研製ASANA一秒神水既能有效1秒滲透，強化肌底DNA及保濕系統、59秒令肌膚回復濕潤;

更可打開肌膚滲透管道，放大吸收能力，令後續產品迅速滲入肌膚底層、加倍發揮功效~

使用5天後明顯亮澤，使用14天後肌膚白滑緊彈~

含6種天然酵素的成份：玄米乳酸菌發酵精華、清酒酵母發酵精華、大豆乳酸菌發酵精華、豆奶乳酸菌發酵精華、槲寄生酵母發酵精華及白茅根酵母發酵精華~

不含酒精、香料，成份全天然，敏感適用~

瓶身好貼心地刻有份量，用起上黎就更方便～

只要係潔臉後，用爽膚水前，每次大約倒1/2格的份量～

ASANA一秒神水質地貼爽膚水分別唔大，無色無味～

我就用濕左神水既化妝綿輕輕全面抹一次，再用手輕輕拍打加強吸收～

基本上佢好快已經吸收哂落皮膚，感覺潤而不笠，之後做返平日護膚步驟就得～

佢仲可以當急救mask用架，將ASANA No.1 一秒神水濕綿敷係臉約15-20分鐘～

皮膚即時飲飽水咁，水噹噹仲會白淨透徹左添^^

用左ASANA一秒神水約兩星期，皮膚明顯水潤有光澤左~

意外既係皮膚更變得白滑，而且比之前有彈性，價錢唔貴有咁既效果真係好驚喜呀^^

有興趣可以去佢地網站了解下：http://no1.asana.com.hk

(感謝產品由ASANA贊助)

2016/03/01

11week 4day - 唐氏測試

Monday, November 9, 2013

繼上次去廣華登記後，今次係第2次黎醫院覆診~
而今日要做一個好重要既檢查，就係唐氏綜合症篩查測試啦~
而家公立醫院都有為所有孕婦提供免費產前唐氏綜合症篩查測試既~
不過名額有限，先到先得ga，book唔到早孕期評估就要做中孕期評估ga啦~
即係懷孕11-14周孕婦就做早孕期評估，早孕期評估準確性逾九成~
如果懷孕15-19周就要做中孕期評估，中孕期評估大概準確性七成左右~
因為早孕期評估會做埋度頸皮，而中孕期評估只限驗血測試和甲胎蛋白血清生化測試所以冇咁準~
而我幸運地好早去登記所以都排到做早孕期評估~
去到先登記，之後坐係度等時睇下vcd了解下唐氏綜合症篩查測試係咩黎~
跟住等叫名就入房用聲波掃描量度胎兒頸部透明層厚度，即係俗稱[度頸皮]啦~
若果厚度超過三毫米，就反映bb可能較高風險患有唐氏綜合症ga啦~
過程其實同一般照聲波冇咩分別，護士都係用儀器係肚到look黎look去~
過我覺得比係私定照時大力，護士會用力按落去比較粗魯，可能咁先睇得清楚卦~
度完等下次覆診就有報告，如果高風險就會打電話通知~
所以check完果個星期都好驚收到電話ga，最後去度一支血就走得啦~
唐氏綜合症篩查測試我覺得都係一個比較重要既檢討，建議唔到預約公立早孕期評估既~
可以考慮轉到獲認證的私家醫院測試，做[敏兒安T21]無創性唐氏綜合症產前診斷臨服務~或者[胎兒染色體異常無創性產前診斷（NIFTY）]，準確率相當高~
但收費比較過，我自己就係公立做冇研究過私家，要自己格下價做資料搜集啦^^

2016/02/22

必成功 ~做法簡單又好食既滷水牛鍵

我好鐘意整定D滷水牛鍵係雪櫃等唔想煮飯煮麵食果時加幾片冇咁Dry~
以前唔識整果時成日以為好難整，所以多數買，但真係唔係間間整我好食又貴~
最後上網睇到Christine食譜點整先發展原來一d都唔難ga!!!
要準備既材料都唔多，第一樣當然要買牛鍵啦~
因為我同老公都好鍾意食，所以我多數一滷就滷2條ga啦~

買返黎既牛鍵要處理下先，先洗乾淨然後將外表既筋膜清走~
咁可以令炆出黎既牛鍵更稔更好食^^
之後放入滾水拖水三分鐘飛水去血水，撈起瀝乾水份就預備滷水汁啦~

滷水汁可以買現貨但我覺得冇自己整咁好食~
而自己整其實都唔難，只要將蒜頭 3至4粒、老薑 4片花椒 10粒、八角 1塊爆香~
之後加入水 2杯、冰糖 18克、果皮 1小片、紹興酒 1湯匙
生抽湯匙 &老抽 2湯匙煮滾後，放入牛展，用中慢火炆至軟身~
汁料最好要蓋過牛鍵，如果蓋唔過就要時不時翻轉牛展繼續煮軟為止~

我用staub，呢個煲我真係好推介，鎖水存熱做得好好所以好快就煮軟~有時間再介紹個煲:p
大概明火細火煲30分鐘再焗佢一個至個半鍾就已經食得啦~
試過如果唔夠軟就自己加長時間啦~

煮好既牛鍵放涼或放入雪櫃雪硬佢就可以較易切到薄片~

食果時再淋上煮熱的滷水汁，加少許麻油就得啦~
剩左既滷水汁唔好倒左佢咁哂，可以用黎再煮雞蛋，滷水雞翼ga~
係咪好易先，鐘意既快d試下自己煮啦^^

2016/02/19

2014年5月21日- 期待已久，仔仔出世了

仔仔唔經唔覺已經歲多啦，呢年幾都好多人問我關於bb既問題~
最多人問我既就係生仔痛唔痛?
話唔痛就呃你既，咁大個bb係個身體生出黎，邊有可能會唔痛?
我預產期係5月27日，咁我懷孕過程身體都OK，唔算太唔舒服~
唔想放前4後6，嗡早放假怕好悶，所以我揀左放前2後8~~~~~
因為之前返工都冇時間執下屋執下BB D野，放產假期間順便執埋~
慢慢執，洗下BB野，用左我3日產假就搞掂哂~~~~~
我果日執完，全日我都係正常活動，完全無任何唔舒服~
仲獎勵左自己食西瓜涼粉，之前又飲左腐竹糖水~
可能因為咁，係20日當晚凌晨我就有D唔舒服啦，有D M痛咁既感覺~
初初我仲以為係假宮縮，所以都冇咩點理，諗住忍下訓著左就唔會痛~
點知由凌晨2點開始都KEEP住咁痛，仲要係5-7分鐘痛一次~
上網睇過D人話第一次生冇咁快生，我又諗我第一次生無理由咁快ga~
特登去toliet睇過又冇見紅又冇穿水，應該都係報假案，所以我都係冇理到~
點知好快已經由7分鐘變到4-5分鐘痛一次，每次痛分零鐘，一次比一次痛~
到4點幾頂唔順就叫醒老公拿拿臨拎埋兩個走佬袋凌晨搭的士去醫院啦~
5點幾去到醫院，登記完初步檢查完換完衫就直接被送入待產室~
入到去有其他痛到死去活來大叫既產婦，老實講老公唔係身邊得自己一個果刻都幾驚~
之後姑娘幫我駁機用黎知道陣痛的規律，俾個掣我感覺到bb郁動時就按一下~
有醫生黎check幫我探宮頸時穿水，原來係會感覺到卜一聲之後好暖既水擁出黎咁~
其實入到待產室我已經好痛但唔敢亂叫，驚叫到唔夠力生所以一直都係死忍用呼吸法令自己冇咁痛~
但之後真係勁痛，果種痛係好似急屎咁~
個仔想衝出黎但你又唔可以用力生屙佢出黎係勁辛苦~
忍左陣我都頂唔順大叫同姑娘講個仔好似想衝出黎唔得啦~!!!!
之後姑娘同我檢查完產房一有位就即推我入去，期間仲未搵到我老公~
入到產房姑娘話我地搵多你老公一次搵唔到你都要生架啦，bb準備好啦~
我係產床都要準備好姿態，張產房腳掌有位置踩住，手要係床支撐半坐咁~
雖然老公未到但我都唔理得咁多因為真係好痛，第一次試生聽住醫生指令~
吸氣……………….痾！用力呀~!!!因為第一次真係唔識發力所以失敗左~
係呢個時候終於甩到我老公入產房，唔知點解果刻見到佢好想喊~
姑娘見到我想喊即話而家冇時間喊啦，留返D力生仔呀!!!聽到佢咁講即刻振作唔想喊啦~哈~
老公係度可能個心定D，push多2,3次左右，寶寶必左出來啦!!!
期間好似聽到姑娘話幫你剪，原來剪果下真係冇感覺完全唔知GA喎~
跟住BB清潔後姑娘將佢放在我心口問我仔定女，之後仔仔就被抱走去磅重保暖~
我就繼續係產床姑娘幫我推返胎盤出黎仲俾我同老公睇~
跟住姑娘幫我打支麻醉針就聯針啦，過程係痛既而唔係冇感覺囉但都要頂敢上ga啦~
聯完針姑娘同老公講其實剪得好小，傷口好細仲叫佢去睇= =
之後姑娘就抱寶寶黎俾佢埋身試母乳，廣華醫院係極度鼓勵母乳我係欣賞既~!
bb好乖好肯張開嘴巴係咁啜，姑娘都讚他叻呀!!!

等左好耐我先轉到去普通六人病房，老公幫我執好物資後就要返工啦~

生完第一個任務就係要係六小時內要去到小便，要屙到一包紙包飲品既份量先合格ga~
期間我吊左支鹽水同埋帶炒米茶飲左幾杯沒幾耐就按鐘表示要去小便，一次就成功左~
未生之前成日諗生仔會唔會好尷尬之類，但到要去生既時候原來呢d野唔理得咁多~
為求快d生完收工可以去得好盡，根本唔會在乎尷唔尷尬lor^^
整個生仔過程黎得快，亦算生得快~
不過我仔仔算錫我，我生產過程以第一胎黎講算好快，所以我覺得係可以接受既痛~
起碼冇令我對生仔產生恐懼啦，哈哈~

2016/02/14

INGRID MILLET - 活膚更生，給你肌膚持久水潤細緻

近日天氣時冷時暖，轉變得太快皮膚都變到非常之乾，乾到甩皮添呀！
適逢新年，當然要搞搞佢唔可以咁肉酸咁過年啦！
正當我煩惱之際收到INGRID MILLET 英格蜜兒邀請我試做療程真係及時雨一樣^^

再次到位於K11既INGRID MILLET專門店，職員依舊親切有禮~
由於我去果日天氣10度唔夠，幫我做療程既美容師Debbie仲好細心幫我開埋暖墊~
所以成個過程都暖笠笠唔怕凍親，確實唔係間間美容院有咁貼心既服務架^^
仲送上一杯溫暖既菊花蜜俾我潤潤添~
係房間換過浴袍，掛好衫鎖好自己既財物之後~
Debbie為我講解一之今日做既B5極速水漾嫩滑療程既功效同流程就開始做啦~

做B5極速水漾嫩滑療程第一步都係卸妝清潔，皮膚分析~
針清，值得一提針清一啲都唔痛架喎，而且清完皮膚都唔會好紅~
仲會有支電棒清毒，可以令傷口快啲癒合架~
之後會用機器分三個距離噴保濕，令皮膚各部位更加吸收，跟住有好舒服既肩頸按摩添^^

B5極速水漾嫩滑療程特別針對改善因嚴重缺水而導致肌膚失去彈性、膚質粗糙、
毛孔粗大、容易泛紅及繃緊不適等肌膚問題，令肌膚持久水潤~
用既就係呢部機啦，仲配合唔同機頭方便用於面部唔同既位置~

美容師用 B5 透明質酸原液搽勻我全臉，之後以超聲波 NanoSlove System 極速將透明質酸注入肌底~
徹底修復及更生因乾燥而受損的肌膚細胞，增強肌膚抵抗力及鎖水能力~
鞏固肌膚天然保護屏障、改善乾紋，同時亦有效鎮靜並舒緩肌膚泛紅情況，令肌膚回復亮澤彈滑~
過程一絲不苟，美容師好細心為我各部位注入B5，頸既位置都做埋架~

做既期間我無咩特別大感覺，初初感覺到有舊凍冰冰既野係臉碌下碌下~
慢慢會覺得佢暖暖地，其實真係好舒服架，哈哈^^
注入完B5之後會做一個軟膜mask，大概20分鐘左右~
之後清潔完個mask搽返護膚就完成今次既療程啦~
做完皮膚真係脫胎換骨咁，水噹噹好有光澤呀，彈性都比之前好左，甩皮鼻終於遠離我！
而且Debbie幫我按面通一通啲淋巴，塊面即刻無咁水腫添呀，同埋好似白左咁^^

而家INGRID MILLET有美肌限定大激賞添呀！
優惠期至 2016 年 2 月 22 日,請即前往https://goo.gl/4h9Y0q ~
完成以下步驟，即可享以優惠價 $988 購買 Age Jet Plasma 等離子療程 (局部)*
*可選擇以下其中一項：1)額頭 2)眼周 3)顴肌部位 4)腮線下巴 5)頸部
B5極速水漾嫩滑療程及活膚補濕體驗套裝(每人原價: $3,910) 二人優惠！立即行動啦！
參加方法:
1. 請先「讚好」英格蜜兒 Facebook 專頁及 LIKE +SHARE 以上 post
2. 於以上 post 留言位置 tag 一位好友
3. 於英格蜜兒分店出示已 LIKE +SHARE 以上 post.

套活膚補濕旅行套裝仲特別包括全效滋潤保濕面膜30ml、活膚修護眼霜7ml 及全效24小時保濕乳霜7ml~
可以為你短時間提升肌膚補濕、滋潤功效，令嚴重缺水及粗糙皮膚問題得到顯著改善，好正架~
之前我做完Age Jet Plasma 等離子療程後皮膚明顯水嫩哂~保濕產品都比之前吸收得快d!
未做之前我皮膚真係超級乾，面同鼻都乾到甩皮~
但做完Age JetPlasma第三日甩皮問題已經解決哂，面頰都提升左彈性多左，明顯無咁包包面~
個陣皮膚真係好到而家唔使化底妝就可以出街^^
咁著數！大家快啲去參加啦！

(感謝產品及資訊由INGRID MILLET提供)