2016/06/03

23Months - 成功介奶咀

其實由細到大翱b奶咀引並唔係好大,無奶咀唔得既~
只不過係臨訓覺前一定要啜住奶咀先訓到,到訓著甩咀佢唔會搵~
同埋佢喊得好勁時啜奶咀可以平服心情,我覺得ok既~
佢唔係依賴奶咀只係安撫,所以一直我都無刻意話幫佢介奶咀~
之後發現佢大個左,出街時訓晏訓都可以唔啜奶咀都訓到,我梗加肯定佢唔係依賴只係心引黎~
本來到歲半左右試過幫佢介,不過當時佢出緊牙脾氣極炆,只有奶咀可以安撫到佢~
又唔忍心係佢咁辛苦既時期唯一安撫物都無埋,所以最終由佢繼續啜~
之後就一直拖到23months啦,23個月先介可能都算遲啦,不過冇所謂啦~哈哈~
其實今次介奶咀都係好隨意試下既心態~
事源係我地帶翱b去台中旅行,第一晚係酒店我突然諗到不如試下同佢講奶咀漏左係屋企無帶,今晚唔啜奶咀食完奶就咁訓睇下佢有咩反應~
其實個奶咀我已經拎定,只係收埋左佢枕頭底~
初初以為佢點都會扭下,點知出奇地佢答我好~
我仲重覆講左幾次提醒佢今晚冇奶咀喎,佢都話好同知道~
老實講我真係好驚訝咁順攤,一啲扭都無??!!
到佢食完奶真係抱一陣就自己乖乖訓著左~
當晚有醒過既,不過拍幾下就訓返啦~
之後幾晚臨訓前都有問奶咀係邊,我由頭一晚話唔記得帶之後直接答佢係飛機跌左~
佢又無咩野,問完聽完抱一陣就自己訓到~
跟住成個旅程既夜晚我都洗腦式晚晚同佢講個奶咀係飛機跌左無架啦,哈哈
返到香港,佢開頭幾日都有問奶咀呢?我問返佢係邊,佢自己識答係飛機跌左~
之後我同佢講:唔緊要啦,飛機咁辛苦帶佢去旅行,你送左奶咀俾飛機啦,佢好開心話好^^
跟住臨訓前就無再問,咁就介左奶咀啦~
整個過程老實講比我想像中易,可能因為佢而家大個聽得明所以好好多~
最後得出小小心得可以分享下~
- 千其唔好心急介奶咀而忽略BB感受,可能係你眼中奶咀只係一舊膠~
但係BB心目中個奶咀係佢好朋友,陪過佢無數唔開心,無安全感時比到安全感佢~
所以未必個個可以一開始就介到,千其唔好勉強佢,總有適合既時機~
- 太細介成功率較低,因為佢唔明你做咩要搶走佢既寶貝奶咀,只會喊得仲勁更加需要奶咀安撫~
- 一步一步黎唔好一刀切,可以先試下介出街訓唔俾佢,之後試下訓左拔返出黎介啜過夜~
慢慢減小佢啜奶咀佢時間同次數,有需要可以搵其他野分散仍注意~
- 可以好似我咁襯出國或有藉口返唔到屋企拎既時候介,可能同我一樣有意想不到既效果
- 朋友話可以試下搽白花油或有得買介奶咀水搽係奶咀上,又或者係奶咀上拮洞OR直接剪爛~
佢食到難食或者感覺唔同左就好快唔啜,都有成功既例子~
希望可以幫到大家,個個都好快介到奶咀啦^^